Ngantos Ngombarra Pajjhar Bakto jhaga malem saellana mokka’ labang ada’na Sa’diyah embu’na Jamen takerjhat amarga ngatela ana’na la etemmo ju’-toju’ neng amper ada’ romana. Patoju’na meddhet ta’ kasa’an ngadep ka temor sambi ngabas bintang porteka se sonarra ngabhiru ngadhirap terrang. Sa’diya nyapa laon ana’na, “Na’ ma’ atoghu dinna’ ba’na, bada apa, sateya ghi’ malem?” Jamen nyaot, “Iya, Bu’, sengko’ terro taowa pajjhar”. Ngeding jawabbha ana’na Sa’diya ngarte ja’ ana’na la tombu pekkeran naleteya tatengnger se bada neng alam. Sa’diya apangarep mandar ana’na leburra nalekteghi alam nemmo bhab se raja ghunana. Melana Sa’diya mokka’ pekkeranna ana’na, “Na’, abassaghi patete langnge’ e temor rowa, degghi’ bakal bada’a dha-tandha se da’ ba’na atamba’a ngarte!”. Jamen gu’-onggu’an ngejappaghi la-balana embu’na. Sakejjha’aghi’, Jamen pas ngatela ngombarra pajjhar dari baba langnge’ mongghing temor pas aorag ce’ peragga, “ Oiiiiii, sengko’ la tao pajjharra Bu’, cajana moncar a...
